Legua irmandiña

Ao abeiro da festa do Asalto ao Castelo, organízase esta carreira popular o sábado 30 de xuño, vertebrada co Castelo e cunha distancia baseada nas antigas unidades de medida. Pouco despois do nacemento desta actividade o alento popular cristalizou no club de atletismo vimiancés Terra de Soneira coorganizador do evento xunto coa A. C. Cherinkas.

Por suposto, a carreira nace imbuída do espírito do Asalto, de tal xeito que a chegada ao Castelo estará ambientada e decorada, máis alá dese momento final monumento e da competición organizada no morrer do día.

Tamén por suposto, todas as idades terán acobillo nas distintas categorías que conforman a carreira. Alén disto, como vén sendo costume, contaremos cunha carreira protagonizada por persoas con diversidade funcional, co gallo de contribuír a inclusión destas persoas na sociedade.

Os actos da proba concluirán con animación musical no foso do castelo, alén da cerimonia de entrega de premios e do avituallamento líquido e sólido de rigor.

Desde o máis amable ánimo irmandiño convidámosvos a participar e a asaltar ás carreiras o castelo. Arde Soneira!

Regulamento IV Legua Irmandiña 2018

Inscríbete en championchipnorte.com